ماسکو میں ایرانی وزیر خارجہ عباس عراقچی نے صدر ولادیمیر پوٹن سے ملاقات کی اور سپریم لیڈر آیت اللہ علی خامنہ ای کا خصوصی پیغام ان تک پہنچایا۔
عالمی ذرائع کے مطابق ملاقات کے دوران صدر پوٹن نے ایران کے خلاف امریکی حملوں کو غیر ضروری اور بلااشتعال قرار دیتے ہوئے ان کی شدید الفاظ میں مذمت کی۔ ان کا کہنا تھا کہ روس ایرانی عوام کے شانہ بشانہ کھڑا ہے اور ہر ممکن مدد فراہم کرنے کی کوشش کرے گا۔
صدر پوٹن نے اس بات کا بھی انکشاف کیا کہ اسرائیلی حکام کی جانب سے یقین دہانی کرائی گئی ہے کہ بوشہر کے نیوکلیئر پاور پلانٹ میں کام کرنے والے روسی ماہرین ان حملوں میں محفوظ رہیں گے۔
روس کے صدر نے ملاقات کے اختتام پر ایرانی وزیر خارجہ سے درخواست کی کہ ان کی نیک خواہشات ایرانی صدر مسعود پزیشکیان اور سپریم لیڈر آیت اللہ خامنہ ای تک ضرور پہنچائی جائیں۔
