گودڑی میں غیر قانونی جنگلی پرندے بیچنے والوں نےوائلڈ لائف ٹیم پر فائر کھول دیے

ملتان(کرائم رپورٹر)لوہاری گیٹ گودڑی میں غیر قانونی جنگلی پرندوں کی خریدوفروخت کرنےوالوں نے وائلڈ لائف ٹیم پر حملہ کردیا،تشدد کا نشانہ بنایا،سیدھے فائر کھول دئیے،علاقہ میں شدید خوف وہراس،شہری گھروں میں محصور ہو کر رہ گئے،پولیس کا رات گئے،ایس ایس پی آپریشن اور ایس پی سٹی کی سربراہی میں ملزمان کی گرفتاری کے لئے اندرون شہر میں چھاپہ 8 ملزمان گرفتار مذید کی گرفتاری کے لئے چھاپے مارے جارہے ہیں،گرفتار ملزمان کے خلاف دہشت گردی،اقدام قتل اور کار سرکار میں مداخلت سمیت دیگر سنگین دفعات کے مقدمات درج کر لئے گئے۔معلوم ہوا ہے کہ ہفتہ اور اتوار کی درمیانی شب کو محکمہ وائلڈ لائف کی ٹیم نے قلعہ کہنہ قاسم باغ کے قریب گودڑی میں غیر قانونی طور پر جنگلی پرندے رکھنے اور انہیں فروخت کرنیوالوں کے خلاف آپریشن کیا تو دکانداروں نے اپنے 70/80 ساتھیوں کو اسلحہ سمیت بلوا لیا جنہوں نے وائلڈ لائف ٹیم کو تشدد کا نشانہ بنایا اور ان پر سیدھے فائر کھول دئیے۔فائرنگ کی آواز سن کر شہریوں میں شدید خوف و ہراس پھیل گیا اور وہ گھروں میں محصور ہو کر رہ گئے،اطلاع ملنے پر پولیس کی بھاری نفری ایس ایس پی آپریشن کامران عامر خان اور ایس پی سٹی مہر سعید سیال کی سربراہی میں موقع پر پہنچ گئی اور انہوں نے رات گئے گودڑی اور اندرون شہر میں چھاپہ مارا اور گھروں کی تلاشی کے دوران ملوث 8 ملزمان کو گرفتار کریا جبکہ دیگر 70/80 ملزمان موقع سے فرار ہوگئے جنکی گرفتاری کے لئے پولیس ٹیمیں تاحال چھاپے مارنے میں مصروف بتائی جاتی ہیں۔بتایا جاتا ہے کہ ملزمان کا تعلق جرائم پیشہ افراد سے ہے اور وہ پہلے بھی پولیس کو کئی مقدمات میں مطلوب ہیں۔ایس ایس پی آپریشن کامران عامر خان نے کہاکہ سرکاری اداروں پر حملہ ریاست کی رٹ چیلنج کرنے کے مترادف ہے، ایسے عناصر سے آہنی ہاتھوں سے نمٹا جائے گا۔ریڈنگ ٹیم میں ڈی ایس پی کبیر خان اور ایس ایچ او لوہاری گیٹ راؤ علی حسن بھی شامل تھے۔