راولپنڈی کے تھانہ آر اے بازار پولیس نے کارروائی کرتے ہوئے بائیکیا رائیڈرز سے موٹرسائیکل چھیننے والے دو رکنی گینگ کو گرفتار کر لیا۔
پولیس کے مطابق گرفتار ملزمان عدیل اور اظہر نے بائیکیا رائیڈرز سے دو موٹرسائیکلیں چھینیں، جنہیں برآمد کر لیا گیا، ساتھ ہی ملزمان کے قبضے سے اسلحہ بھی برآمد ہوا۔
پولیس کا کہنا ہے کہ یہ ملزمان ایپ کے بغیر بائیکیا موٹرسائیکل بک کراتے اور پھر گن پوائنٹ پر موٹر سائیکل چھین لیتے تھے۔
ایس پی پوٹھوہار طلحہ ولی نے اس کارروائی پر پولیس کی تعریف کی اور کہا کہ ملزمان کے خلاف ٹھوس شواہد کے ساتھ عدالت میں چالان کیا جائے گا۔ انہوں نے شہریوں کی حفاظت کو اپنی اولین ترجیح قرار دیتے ہوئے کہا کہ اس مقصد کے لیے تمام وسائل بروئے کار لائے جا رہے ہیں۔
