لاہور: پولیس ذرائع کے مطابق رات گئے مزنگ پولیس نے اچھرہ سے اعجاز نامی نوجوان کو حراست میں لیا، جسے بعد میں طبیعت خراب ہونے پر اسپتال منتقل کیا گیا، مگر وہ جانبر نہ ہو سکا۔
پولیس کے مطابق اعجاز کے بھائی انعام کو گرفتار کرنے کی کوشش کی گئی تھی، مگر وہ موقع سے فرار ہوگیا، جس کے بعد پولیس نے اس کے بھائی اعجاز کو حراست میں لے لیا۔ انعام منشیات فروشی کے مقدمے میں مطلوب تھا۔
پولیس حکام کا کہنا ہے کہ اعجاز کو قانونی طریقے سے حراست میں لیا گیا تھا اور تھانے منتقل کرتے وقت اس کی طبیعت بگڑ گئی، جس کے بعد اسے اسپتال لے جایا گیا، جہاں وہ دم توڑ گیا۔
ایس پی سول لائنز کے مطابق متوفی کے خلاف منشیات فروشی کے مقدمات درج تھے۔ دوسری جانب ورثا نے پولیس پر تشدد کا الزام عائد کرتے ہوئے شدید احتجاج کیا ہے۔
ایس پی عبدالحنان نے ان الزامات کو بے بنیاد قرار دیتے ہوئے کہا کہ پولیس کسی غیر قانونی عمل میں ملوث نہیں، اور پوسٹ مارٹم رپورٹ کے بعد تمام حقائق سامنے آ جائیں گے۔
