اسرائیلی پارلیمنٹ (کنیسٹ) کے اسپیکر نے قطر کے دارالحکومت دوحہ پر اسرائیلی فضائی حملے کو مشرق وسطیٰ کے لیے ایک واضح انتباہ قرار دیا ہے۔
غیر ملکی میڈیا کے مطابق اسپیکر نے اسرائیلی فضائیہ کی جانب سے دوحہ میں حماس کے دفتر پر کیے گئے حملے کی ویڈیو سوشل میڈیا پر شیئر کرتے ہوئے کہا: “یہ پورے خطے کے لیے ایک پیغام ہے۔”
اسرائیلی فوج نے دوحہ میں فلسطینی مزاحمتی تنظیم حماس کے دفتر کو اس وقت نشانہ بنایا جب قیادت غزہ میں جنگ بندی معاہدے پر بات چیت کر رہی تھی۔
اسرائیلی وزیر اعظم اور فوج نے حملے کی ذمہ داری قبول کی اور بتایا کہ اس کا مقصد حماس کی اعلیٰ قیادت کو ٹارگٹ کرنا تھا۔
دوسری جانب حماس کے سیاسی دفتر کے رکن سہیل الہندی نے تصدیق کی کہ حملے میں حماس قیادت محفوظ رہی، تاہم رہنما خلیل الحیہ کے بیٹے حمام الحیہ اور دفتر کے انچارج جہاد لبد جان سے گئے، جب کہ تین محافظوں سے رابطہ منقطع ہو گیا ہے