ممبئی: لارنس بشنوئی گینگ کی جانب سے دھمکیوں اور کیفے پر حملوں کے بعد ممبئی پولیس نے معروف کامیڈین کپل شرما کی سیکیورٹی سخت کر دی ہے۔
بھارتی میڈیا رپورٹس کے مطابق کپل شرما کے کینیڈا میں واقع کیفے پر حال ہی میں فائرنگ کا واقعہ پیش آیا، جس کی ذمہ داری لارنس بشنوئی گینگ نے قبول کی ہے۔ اس گینگ نے سلمان خان کے ساتھ کام کرنے والے افراد کو بھی شدید دھمکیاں دی ہیں۔
کپل شرما اس کامیڈی شو کے میزبان ہیں جس کی پروڈکشن سلمان خان کی کمپنی کرتی ہے، جس کی وجہ سے گینگ کی جانب سے ان پر حملے اور دھمکیاں دی جا رہی ہیں۔ کینیڈا میں ان کے کیفے پر یہ دوسرا حملہ ہے جس میں تقریباً 25 گولیاں چلائی گئیں۔ حملے کی ویڈیو سوشل میڈیا پر وائرل ہوئی ہے، جس میں دھمکی دی گئی کہ اگر ہدف نے کال نہیں مانی تو ممبئی میں اگلا اقدام کیا جائے گا۔
لارنس بشنوئی گینگ کے رکن گورپریت سنگھ المعروف گولڈی دھلوں اور لارنس بشنوئی نے اس حملے کی ذمہ داری قبول کی ہے۔ جولائی میں بھی اسی کیفے پر فائرنگ کا واقعہ ہوا تھا مگر کوئی جانی نقصان نہیں ہوا تھا۔
علاوہ ازیں، گینگ نے سلمان خان کے ساتھ کام کرنے والے تمام فنکاروں، پروڈیوسرز اور ڈائریکٹرز کو خبردار کیا ہے کہ اگر وہ اداکار کے ساتھ کام کریں تو ان کے خلاف سخت کارروائی کی جائے گی۔
سلمان خان کو بھی بشنوئی گینگ کی جانب سے متعدد بار قتل کی دھمکیاں موصول ہو چکی ہیں کیونکہ وہ 1998 میں جودھ پور میں نایاب کالی ہرن کے شکار کے مقدمے کا سامنا کر رہے ہیں جسے بشنوئی مقدس جانتے ہیں۔
