کراچی: لانڈھی قذافی ٹاؤن کے ایک گھر میں فائرنگ کے نتیجے میں ایک میاں بیوی جاں بحق ہو گئے۔
تفصیلات کے مطابق واقعہ شاہ لطیف علاقے، اقصیٰ مسجد کے قریب پیش آیا۔ جاں بحق ہونے والوں کی لاشیں جناح اسپتال منتقل کر دی گئی ہیں۔
ترجمان کراچی پولیس کے مطابق ہلاک شدگان کی شناخت 30 سالہ محمد ارشد ولد محمد صدیق اور 27 سالہ صائمہ عرف سونیا زوجہ محمد ارشد کے نام سے ہوئی ہے۔ پولیس نے بتایا کہ یہ میاں بیوی تھے، اور کچھ عرصہ قبل انہوں نے پسند کی شادی کی تھی۔
ابتدائی تحقیقات کے مطابق خاتون کو اس کے سابق شوہر اور اس کے ساتھی نے فائرنگ کر کے قتل کیا، جس کے بعد ملزمان فرار ہو گئے۔ پولیس جائے وقوعہ سے شواہد اکٹھے کر رہی ہے اور ملزمان کی گرفتاری کے لیے چھاپے جاری ہیں۔
