ملتان (سٹاف رپورٹر) کامسیٹس یونیورسٹی ا سلا م آباد میں نان فیکلٹی ملازمین کی ترقیوں، سروس سٹرکچر اور مالی مراعات کے حوالے سے ایک اہم پیش رفت سامنے آئی ہے۔
سیوا سینٹرل (CEWA Central) کے صدر حفیظ اللہ شاہ نے ریکٹر سی یو آئی کو باضابطہ مراسلہ ارسال کرتے ہوئے مطالبہ کیا ہے کہ OG آفیسرز اور SG-IV ملازمین کی پروموشنز سینیارٹی اور فٹنس کی بنیاد پر دی جائیں تاکہ ادارے میں میرٹ، شفافیت اور مساوی سلوک کو یقینی بنایا جا سکے۔ مراسلے میں مؤقف اختیار کیا گیا ہے کہ نان فیکلٹی سٹاف کی ترقیوں کے لیے جامع اور یکساں پالیسی مرتب کی جائے، جس کے تحت موجودہ گریڈ کو اپ گریڈ کرنے، گریڈ برقرار رکھنے یا منظور شدہ خالی اسامیوں کو منصفانہ انداز میں مختص کرنے جیسے اقدامات پر سنجیدگی سے غور کیا جائے۔ مزید کہا گیا کہ اگر ترقیوں کو کیڈر کے مطابق نافذ کیا جائے تو یہ پالیسی تمام اہل ملازمین پر بلاامتیاز لاگو ہونی چاہیے اور تمام پروموشنز وفاقی سرکاری سروس رولز کے مطابق عمل میں لائی جائیں۔ سیوا سینٹرل نے فکسشن پیریڈ کو اہلیت اور سروس بینیفٹس کے تعین میں شامل کرنے کی بھی سفارش کی جبکہ ایکسٹرا آرڈینری لیو (EOL) کو اہل سروس کی مدت میں شمار نہ کرنے کی تجویز دی گئی، جیسا کہ وفاقی سروس رولز میں درج ہے۔ حالیہ انتظامی تعیناتیوں پر بھی مراسلے میں توجہ دلائی گئی ہے۔ In-Charge (Academic) اور In-Charge (Administration) کی تعیناتیوں کے تناظر میں مطالبہ کیا گیا ہے کہ انچارج (ایڈمنسٹریشن) کا تقرر انتظامی شعبے کے اندر سے کیا جائے تاکہ ادارہ جاتی فعالیت اور انتظامی تسلسل برقرار رہے۔ مزید یہ کہ ایسے فیصلوں کو عارضی انتظام کے بجائے مستقل ڈائریکٹر یا متعلقہ فورمز خصوصاً سنڈیکیٹ سے باضابطہ منظوری دلائی جائے تاکہ پالیسی استحکام یقینی ہو سکے۔ مالی معاملات کے حوالے سے مراسلے میں نشاندہی کی گئی کہ گزشتہ برس پرنسپل سیٹ نے پے سکیل میں ترمیم کی عملداری کی تھی، لہٰذا ملازمین کو وفاقی حکومت کے اعلان کے مطابق 30 فیصد ڈسپیرٹی ریڈکشن الاؤنس (DRA) اور متعلقہ ایس آر او کے تحت پے سکیل میں ترمیم فراہم کی جائے۔ مزید برآں، ٹائم اسکیل پروموشن کے بعد پے سکیل کی ترمیم موجودہ مالی سال میں نافذ کرنے کا بھی مطالبہ کیا گیا تاکہ اہل ملازمین کے مالی فوائد اور سروس مدت متاثر نہ ہو۔ سیوا سینٹرل کے صدر حفیظ اللہ شاہ نے اپنے مراسلے میں امید ظاہر کی کہ سی یو آئی کی اعلیٰ قیادت ملازمین کے ترقیاتی اور مالی حقوق کے معاملات پر مثبت اور فوری غور کرے گی، تاکہ ادارے میں مساوی مواقع، انتظامی ہم آہنگی اور پیشہ ورانہ اطمینان کو فروغ مل سکے۔