لاہور کے علاقے ڈیفنس میں 82 لاکھ روپے کی بڑی ڈکیتی میں حیران کن انکشاف سامنے آیا ہے، جہاں 14 سال سے کام کرنے والی دو گھریلو ملازمہ خواتین ہی واردات کی ماسٹر مائنڈ نکلیں۔
پولیس کے مطابق مذکورہ خواتین نے ایک ڈکیت گروہ کے ساتھ مل کر واردات کی منصوبہ بندی کی اور ڈاکوؤں کو گھر میں داخل کروایا۔ اس ڈکیت گینگ کا سرغنہ عثمان بٹ ساتھیوں سمیت گرفتار کرلیا گیا، جب کہ دونوں ملازمہ خواتین کو بھی حراست میں لے لیا گیا۔
حکام کا کہنا ہے کہ ملزمان سے چوری شدہ سونا اور نقدی برآمد کرلی گئی ہے۔ تفتیش میں معلوم ہوا کہ ڈاکوؤں کو پہلے سے ہی گھر کی تمام قیمتی اشیاء کی لوکیشن معلوم تھی، اور انہوں نے لوٹا گیا سونا ایک جیولری شاپ پر فروخت کردیا، جہاں سے پولیس نے برآمد کرلیا۔
