ایک حالیہ سائنسی تحقیق سے یہ چونکا دینے والا انکشاف ہوا ہے کہ سونے سے قبل دودھ، پنیر، دہی یا آئس کریم جیسے ڈیری مصنوعات کا زیادہ استعمال نیند میں خلل اور برے خوابوں کا باعث بن سکتا ہے۔
تحقیق میں شامل متعدد افراد نے بتایا کہ جب وہ سونے سے کچھ دیر قبل ڈیری مصنوعات استعمال کرتے ہیں تو ان کے خواب نہ صرف غیر حقیقی اور زیادہ واضح ہو جاتے ہیں بلکہ اکثر پریشان کن بھی ہوتے ہیں۔
ماہرین کے مطابق ڈیری مصنوعات میں “ٹائروسین” نامی امائنو ایسڈ پایا جاتا ہے جو دماغ میں ڈوپامائن کی مقدار بڑھاتا ہے، جس سے دماغی سرگرمیاں تیز ہو جاتی ہیں۔ یہی کیفیت نیند کے دوران شدید اور غیر معمولی خوابوں کا سبب بن سکتی ہے۔
اس کے علاوہ سونے سے کچھ دیر پہلے دودھ یا پنیر جیسی اشیاء لینے سے بدہضمی، گیس یا سینے کی جلن کی شکایت بھی ہو سکتی ہے، جو نیند کو متاثر کرتی ہے اور خواب غیر آرام دہ بنا سکتی ہے۔
“انٹرنیشنل جرنل آف ڈریم ریسرچ” میں شائع ایک رپورٹ کے مطابق، تحقیق میں شامل 17 سے 20 فیصد افراد نے اعتراف کیا کہ ڈیری مصنوعات کا استعمال ان کے برے خوابوں سے منسلک رہا۔
اگرچہ ہر فرد کا جسم اور دماغ الگ طریقے سے ردعمل دیتا ہے، مگر ماہرین تجویز کرتے ہیں کہ سونے سے دو سے تین گھنٹے قبل ڈیری مصنوعات کے استعمال سے گریز کیا جائے تاکہ نیند بہتر اور سکون دہ ہو۔
