اسلام آباد: ملک بھر میں چینی کی قیمت میں غیر معمولی اضافہ دیکھنے میں آیا ہے، جہاں کئی شہروں میں فی کلو چینی کی قیمت 200 روپے کے قریب پہنچ گئی ہے۔ وفاقی ادارہ شماریات کی تازہ رپورٹ کے مطابق ملک میں چینی کی اوسط قیمت 188 روپے 44 پیسے فی کلو تک جا پہنچی ہے، جو پچھلے ہفتے کے مقابلے میں 3 روپے 52 پیسے زیادہ ہے۔ کراچی، اسلام آباد اور راولپنڈی جیسے بڑے شہروں میں چینی کی قیمت 200 روپے فی کلو تک پہنچ گئی ہے۔ ایک سال کے دوران چینی کی قیمت میں مجموعی طور پر 42 روپے 56 پیسے کا اضافہ ہوا ہے، جو صارفین اور صنعتی شعبوں کے لیے سنگین چیلنج بن چکا ہے۔ اقتصادی ماہرین کا کہنا ہے کہ مہنگائی کی یہ لہر عام شہریوں اور بیکری، مشروبات، اور کنفیکشنری صنعتوں پر بھی منفی اثرات مرتب کر رہی ہے۔
