پی ڈی ایم اے پنجاب نے مون سون کی 10 ویں لہر کے پیش نظر صوبے کے لیے الرٹ جاری کر دیا ہے۔ ترجمان پی ڈی ایم اے کے مطابق 6 سے 9 ستمبر کے دوران پنجاب کے بیشتر اضلاع میں شدید طوفانی بارشیں متوقع ہیں۔
راولپنڈی، مری، گلیات، اٹک، چکوال، جہلم، گجرانوالہ، لاہور، گجرات اور سیالکوٹ میں بارش کا امکان ہے جبکہ نارووال، حافظ آباد، منڈی بہاالدین، اوکاڑہ، ساہیوال، قصور، جھنگ، سرگودھا اور میانوالی میں بھی بارش ہو سکتی ہے۔
اسی کے ساتھ ڈیرہ غازی خان، ملتان اور راجن پور کے اضلاع میں بھی بارشیں متوقع ہیں۔ ترجمان پی ڈی ایم اے نے بتایا کہ 7 سے 9 ستمبر کے دوران ڈیرہ غازی خان کے رودخانوں میں فلیش فلڈنگ کا خدشہ ہے۔
پی ڈی ایم اے پنجاب نے صوبے بھر کے کمشنرز اور ڈپٹی کمشنرز کو الرٹ رہنے کی ہدایات جاری کی ہیں۔ ڈی جی عرفان علی کاٹھیا کے مطابق دریائے چناب، راوی اور ستلج میں سیلابی صورتحال ہے جبکہ بڑے شہروں میں مون سون بارشوں کے سبب ندی نالے بپھر سکتے ہیں۔
انہوں نے کہا کہ کمشنرز، ڈپٹی کمشنرز اور متعلقہ ادارے الرٹ ہیں۔ محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک کو بھی الرٹ جاری کیا گیا ہے۔ شہریوں سے اپیل کی گئی ہے کہ خراب موسم میں احتیاطی تدابیر اختیار کریں، دریاؤں کے کنارے اکٹھے نہ ہوں، سیرو تفریح سے گریز کریں، آندھی یا طوفان کی صورت میں محفوظ مقامات پر رہیں اور غیر ضروری سفر سے پرہیز کریں۔ ایمرجنسی کی صورت میں پی ڈی ایم اے ہیلپ لائن 1129 پر رابطہ کیا جا سکتا ہے۔
