الیکشن کمیشن نے پنجاب اسمبلی کے حلقہ پی پی 289 ڈی جی خان-4 کے ضمنی انتخاب کا باضابطہ شیڈول جاری کر دیا ہے۔
جاری کردہ تفصیلات کے مطابق حلقے میں پولنگ 25 جنوری کو ہوگی، جبکہ کاغذاتِ نامزدگی جمع کروانے کا عمل 10 دسمبر سے شروع ہوگا۔ کاغذات نامزدگی کی ابتدائی فہرست 13 دسمبر کو جاری کی جائے گی۔
کاغذات کی جانچ پڑتال 18 دسمبر تک مکمل کی جائے گی۔ اپیلیں داخل کرنے کی آخری تاریخ 22 دسمبر مقرر کی گئی ہے، جبکہ ان اپیلوں پر فیصلے 29 دسمبر تک سنائے جائیں گے۔
الیکشن کمیشن کے مطابق نظرِ ثانی شدہ امیدواروں کی فہرست 30 دسمبر کو جاری ہوگی، اور امیدوار 31 دسمبر تک دستبرداری اختیار کر سکیں گے۔ انتخابی نشانات 1 جنوری کو جاری کیے جائیں گے۔
حلقہ اس وقت خالی ہے کیونکہ محمود قادر نے قومی اسمبلی کی نشست سنبھال لی ہے۔ ضمنی انتخاب کے لیے ڈپٹی کمشنر ڈی جی خان کو ڈسٹرکٹ ریٹرننگ افسر جبکہ سی ای او ویسٹ مینجمنٹ کمپنی ڈی جی خان کو ریٹرننگ افسر مقرر کیا گیا ہے۔
