لاہور: پی ٹی آئی کے رکن پنجاب اسمبلی شیخ امتیاز نے اپنی اسمبلی رکنیت معطل کیے جانے کے خلاف عدالت میں درخواست دائر کر دی ہے۔
شیخ امتیاز کی طرف سے لاہور ہائیکورٹ میں دائر کردہ درخواست میں گورنر پنجاب، اسپیکر پنجاب اسمبلی اور دیگر کو فریق بنایا گیا ہے۔
درخواست گزار نے اپنے وکیل اظہر صدیق کے ذریعے موقف اختیار کیا ہے کہ انہوں نے پنجاب اسمبلی کے اجلاس میں کورم نہ ہونے کی نشاندہی کی تھی، جس کے بعد ان کی رکنیت 15 روز کے لیے معطل کر دی گئی۔
شیخ امتیاز نے کہا کہ اسپیکر کو ایسی رولنگ دینے کا اختیار نہیں تھا اور انہوں نے گورنر پنجاب کو بھی اس حوالے سے خط لکھا لیکن کوئی جواب نہیں ملا۔
انہوں نے لاہور ہائیکورٹ سے استدعا کی ہے کہ ان کی رکنیت معطلی کا فیصلہ کالعدم قرار دیا جائے۔
