پشاور :پاکستان تحریک انصاف (پی ٹی آئی) نے خیبرپختونخوا میں مخصوص نشستوں سے متعلق پشاور ہائیکورٹ میں باضابطہ طور پر درخواست دائر کر دی ہے۔ یہ درخواست پارٹی کے صوبائی جنرل سیکرٹری علی اصغر کی جانب سے دائر کی گئی ہے۔
درخواست میں مؤقف اختیار کیا گیا ہے کہ مخصوص نشستیں پی ٹی آئی کا آئینی و قانونی حق ہیں، لیکن نہ صرف پارٹی کو سنا نہیں گیا بلکہ عدالت کو اس حوالے سے غلط معلومات فراہم کی گئیں جس کی بنیاد پر فیصلہ متاثر ہوا۔
پی ٹی آئی نے درخواست میں استدعا کی ہے کہ پشاور ہائیکورٹ کا 13 اور 14 مارچ 2024 کا فیصلہ کالعدم قرار دیا جائے اور پارٹی کو اپنا مؤقف پیش کرنے کا موقع دیا جائے تاکہ انصاف کے تقاضے مکمل ہو سکیں۔
درخواست میں الیکشن کمیشن آف پاکستان سمیت دیگر متعلقہ فریقین کو بھی شامل کیا گیا ہے۔
یہ آئینی قدم ایسے وقت پر اٹھایا گیا ہے جب پی ٹی آئی مسلسل یہ مؤقف اپنائے ہوئے ہے کہ مخصوص نشستوں کے حوالے سے اس کے حق کو نظرانداز کر کے نمائندگی کے بنیادی اصولوں کی خلاف ورزی کی جا رہی ہے۔
درخواست پر ابتدائی سماعت کی تاریخ جلد متوقع ہے۔
