اسلام آباد: پاکستان پیپلز پارٹی نے اپنی اتحادی جماعت مسلم لیگ (ن) سے ایک بار پھر شکوہ کرتے ہوئے کہا ہے کہ اہم فیصلوں میں اعتماد میں نہ لینے کا رویہ قابل قبول نہیں۔ پیپلز پارٹی کی مرکزی سیکرٹری اطلاعات شازیہ مری نے پاکستان میری ٹائم اینڈ سی پورٹ اتھارٹی کے قیام کے فیصلے پر ردعمل دیتے ہوئے سخت تحفظات کا اظہار کیا۔
شازیہ مری کا کہنا تھا کہ وفاقی حکومت مسلسل ایسے فیصلے کر رہی ہے جن پر پاکستان پیپلز پارٹی اور حکومتِ سندھ کو اعتماد میں نہیں لیا جا رہا۔ انہوں نے کہا، “پاکستان میری ٹائم اینڈ سی پورٹ اتھارٹی کے قیام کا فیصلہ اتحادی اصولوں کی خلاف ورزی ہے۔ شاید مسلم لیگ ن کو اس بات کا ادراک نہیں کہ یہ رویہ اتحاد کو نقصان پہنچا سکتا ہے۔”
انہوں نے مزید کہا کہ حکومتِ سندھ اور پیپلز پارٹی دونوں کو اس فیصلے سے لاعلم رکھا گیا، اور اگر پیپلز پارٹی نے حمایت واپس لے لی تو وفاقی حکومت اپنی بقا کھو دے گی۔
یہ بیان ایسے وقت میں آیا ہے جب اتحادی حکومت کو پہلے ہی کئی چیلنجز کا سامنا ہے، اور پیپلز پارٹی کی جانب سے اس نوعیت کی تنقید اتحاد میں دراڑوں کی نشاندہی کرتی ہے۔