لاہور: ملک میں پہلی بار سیلاب متاثرین کی تلاش اور ریسکیو کے لیے ڈرون ٹیکنالوجی کامیابی کے ساتھ استعمال کی جا رہی ہے۔ وزیر اعلیٰ مریم نواز شریف کی ہدایت پر مختلف شہروں میں تھرمل امیجنگ ڈرونز کے ذریعے دشوار گزار اور دور افتادہ علاقوں میں موجود متاثرین کی شناخت کر کے ریسکیو آپریشن کیا گیا۔
جھنگ کے علاقے سیمی پل بائی پاس سرگودھا روڈ اور دیگر مقامات پر ڈرونز کی مدد سے سیلابی پانی میں گھرے افراد اور مال مویشیوں کی تلاش کی گئی۔ تھرمل امیجنگ کیمروں نے پانچ افراد اور متعدد مویشیوں کی نشاندہی کی، جنہیں فوری طور پر ریسکیو ٹیم نے محفوظ مقامات پر منتقل کیا۔
چشتیاں کی دریائی بیلٹ اور بہاولنگر کے سیلاب متاثرہ علاقوں میں بھی ڈرون کیمروں کا استعمال جاری ہے، جس سے متاثرین کی تلاش اور محفوظ مقامات تک منتقل کرنے کے عمل میں مدد مل رہی ہے۔ ریسکیو بوٹس کی مدد سے متاثرین اور مال مویشیوں کو محفوظ مقامات تک پہنچایا جا رہا ہے۔
