لاہور: پی ڈی ایم اے پنجاب نے مون سون بارشوں کے آئندہ اسپیل کی پیش گوئی کے ساتھ فلڈ ایڈوائزری جاری کر دی ہے۔
میڈیا نیوز کے مطابق ترجمان پی ڈی ایم اے نے دریائے ستلج، راوی، چناب، جہلم اور ملحقہ ندی نالوں میں ممکنہ سیلاب سے متعلق وارننگ جاری کی ہے۔ مون سون کا ساتواں اسپیل 13 اگست سے شروع ہونے کا امکان ہے، جس کے دوران بڑے دریاؤں میں پانی کی سطح میں اضافے کا خدشہ ظاہر کیا گیا ہے۔
صوبے کے تمام کمشنرز، ڈپٹی کمشنرز اور متعلقہ اداروں کو ہائی الرٹ رہنے کی ہدایات دی گئی ہیں، جبکہ لوکل گورنمنٹ، محکمہ زراعت، آبپاشی، صحت، جنگلات، لائیو اسٹاک اور ٹرانسپورٹ کو بھی الرٹ کر دیا گیا ہے۔
ڈی جی پی ڈی ایم اے عرفان علی کاٹھیا نے وزیر اعلیٰ پنجاب کی ہدایات کے تحت پیشگی انتظامات مکمل کرنے، ایمرجنسی کنٹرول رومز میں 24 گھنٹے اسٹاف موجود رکھنے اور ریسکیو 1122 کی ڈیزاسٹر رسپانس ٹیموں کو ہائی الرٹ رکھنے کا حکم دیا ہے۔
انہوں نے مزید کہا کہ عوام کو حالات سے مسلسل آگاہ رکھا جائے اور دریاؤں کے پاٹ میں موجود مکانوں و مویشیوں کو محفوظ مقامات پر منتقل کیا جائے۔ عوام احتیاطی تدابیر پر عمل کریں اور دریاؤں، نہروں، ندی نالوں یا تالابوں میں نہانے سے گریز کریں۔ ہنگامی صورتحال میں شہری پی ڈی ایم اے ہیلپ لائن 1129 پر رابطہ کریں۔
