لاہور سمیت پنجاب کے مختلف علاقوں میں مون سون سسٹم کی شدت میں کمی کے باعث گرمی اور حبس میں واضح اضافہ دیکھنے میں آ رہا ہے۔
محکمہ موسمیات کا کہنا ہے کہ مون سون ہوائیں کمزور پڑنے کی وجہ سے بارشوں کا سلسلہ سست ہو چکا ہے جس کے باعث درجہ حرارت بڑھ رہا ہے اور فضا میں نمی کے باعث حبس میں اضافہ ہو گیا ہے۔
ماہرین نے پیش گوئی کی ہے کہ آج کا دن خشک اور گرم رہے گا، بارش کے امکانات بہت کم ہیں۔ لاہور میں کم سے کم درجہ حرارت 28 ڈگری جبکہ زیادہ سے زیادہ درجہ حرارت 33 ڈگری سینٹی گریڈ تک پہنچنے کی توقع ہے۔
موسمی ماہرین نے شہریوں کو سخت گرمی اور حبس کے پیش نظر احتیاط برتنے کی ہدایت کی ہے۔
دوسری جانب پی ڈی ایم اے نے 28 تا 31 جولائی مون سون کے پانچویں اسپیل کے پیش نظر الرٹ جاری کیا ہے، جس کے بعد واسا، ایل ڈبلیو ایم سی، بلدیہ لاہور اور ہاؤسنگ ڈیپارٹمنٹ نے فوری اقدامات کا آغاز کر دیا ہے تاکہ ممکنہ بارشوں سے نمٹنے کے لیے نکاسی آب اور صفائی کے انتظامات بہتر بنائے جا سکیں۔
محکمہ موسمیات، پی ڈی ایم اے اور دیگر ادارے موسم کی صورتحال پر مسلسل نظر رکھے ہوئے ہیں اور عوام کو بروقت معلومات فراہم کرنے میں مصروف ہیں۔
