پنجاب اور کے پی کے: سیلاب متاثرہ علاقوں میں بجلی کی بحالی کی تازہ رپورٹ جاری

اسلام آباد: پاور ڈویژن نے سیلاب سے متاثرہ علاقوں میں بجلی کی بحالی کی تازہ ترین صورتحال کا اعلان کر دیا ہے۔ رپورٹ کے مطابق پشاور الیکٹرک سپلائی کمپنی (پیسکو) کے علاقوں سوات، بونیر، شانگلہ، صوابی اور ڈی آئی خان کے 12 گرڈ اور 91 فیڈرز متاثر ہوئے، جن میں سے 85 فیڈرز مکمل اور 6 جزوی طور پر بحال کر دیے گئے ہیں۔
گوجرانوالہ الیکٹرک سپلائی کمپنی (گیپکو) کے 10 گرڈ اور 87 متاثرہ فیڈرز میں سے 82 مکمل اور 5 جزوی طور پر بحال ہوئے ہیں۔ لاہور الیکٹرک سپلائی کمپنی (لیسکو) کے علاقوں لاہور، اوکاڑہ، شیخوپورہ، قصور اور ننکانہ کے 62 متاثرہ فیڈرز میں سے 43 فیڈرز جزوی طور پر بحال کیے گئے ہیں، اور مکمل بحالی 2 ستمبر سے 5 ستمبر تک متوقع ہے۔
فیصل آباد الیکٹرک سپلائی کمپنی (فیسکو) کے ٹی ٹی سنگھ، فیصل آباد، چنیوٹ، جھنگ، سرگودھا، میانوالی اور ڈی آئی خان کے 26 گرڈ اور 76 فیڈرز میں سے 72 فیڈرز عارضی طور پر بحال کر دیے گئے ہیں۔
ملتان الیکٹرک پاور کمپنی (میپکو) کے زیرِانتظام علاقوں میں 126 متاثرہ فیڈرز عارضی طور پر بحال کر دیے گئے ہیں اور پانی کم ہوتے ہی مکمل بحالی کا عمل شروع کیا جائے گا۔
ٹرائیبل الیکٹرک سپلائی کمپنی (ٹیسکو) کے علاقوں شمالی وزیرستان اور خیبر کے 10 فیڈرز میں سے 1 مکمل اور 4 عارضی طور پر بحال ہیں۔ ہزارہ الیکٹرک سپلائی کمپنی (ہیزکو) کے مانسہرہ کے 3 متاثرہ فیڈرز میں سے 2 مکمل بحال ہوئے ہیں۔ مجموعی طور پر ہیزکو کے 48 گرڈ اور 455 متاثرہ فیڈرز میں سے 170 مکمل اور 256 عارضی طور پر فعال ہیں۔