لاہور: پنجاب اسمبلی میں اپوزیشن لیڈر کے انتخاب کے لیے تحریک انصاف نے بانی چیئرمین عمران خان کو پانچ نام تجویز کر دیے۔
ذرائع کے مطابق پی ٹی آئی کی سیاسی کمیٹی نے اپوزیشن لیڈر پنجاب اسمبلی کے لیے معین ریاض قریشی، علی امتیاز وڑائچ، اعجاز شفیع، شیخ امتیاز اور رانا شہباز کے نام عمران خان کو بھیجے ہیں، جن میں سے وہ حتمی فیصلہ کریں گے۔
پارٹی ذرائع کا کہنا ہے کہ معین قریشی کو پارلیمانی پارٹی اور متعدد اراکین اسمبلی کی حمایت حاصل ہے اور وہ نمبر گیم میں سب سے آگے ہیں۔ اپوزیشن لیڈر کے انتخاب کے لیے سیاسی کمیٹی مشاورت کے عمل میں سابق اپوزیشن لیڈر ملک احمد خان بھچر سے بھی رائے لے گی، جن کی حمایت بھی معین قریشی کے ساتھ بتائی جا رہی ہے۔
ذرائع کے مطابق اپوزیشن لیڈر کی نامزدگی آئندہ پنجاب اسمبلی اجلاس سے قبل ضروری ہے، جبکہ دیگر امیدواروں میں رانا شہباز، اعجاز شفیع اور علی امتیاز وڑائچ بھی شامل ہیں۔
