پاکستان کو سب سے بڑا خطرہ اندر سے ہے، علیمہ خان

لاہور: علیمہ خان نے کہا ہے کہ پاکستان کو سب سے بڑا خطرہ بیرون ملک سے نہیں بلکہ اندرونی کمزوریوں سے ہے، اس لیے ہمیں سب سے پہلے ملک کو اندر سے مضبوط کرنا ہوگا۔
اسلام آباد ہائی کورٹ کے باہر میڈیا سے گفتگو کرتے ہوئے عمران خان کی ہمشیرہ علیمہ خان نے کہا کہ دشمن کو کبھی ہمت نہیں ہو سکتی کہ پاکستان کی طرف بری نظر ڈالے، ہماری قوم میں اس کا بھرپور جواب دینے کی صلاحیت ہے۔
انہوں نے کہا کہ فیصل چوہدری نے گزشتہ روز نریندر مودی سے متعلق عمران خان کا مکمل بیان نہیں سنایا۔ بانی پی ٹی آئی نے کہا تھا کہ مودی کے اقدامات نے پاکستانیوں کو ایک قوم کی حیثیت سے متحد کر دیا ہے۔
علیمہ خان نے مزید کہا کہ عمران خان نے یہ بھی واضح کیا کہ وہ فارم 47 کے تحت بننے والی حکومت کو تسلیم نہیں کرتے، مگر فیصل چوہدری یہ اہم بات بتانا بھول گئے۔
انہوں نے عدالتی نظام پر سوال اٹھاتے ہوئے کہا کہ اگر اعلیٰ عدلیہ خود قانون کی بالادستی کے لیے کھڑی نہیں ہوگی تو پھر عوام کس کے پاس جائیں گے؟ اگر ہائی کورٹ بے اختیار ہو جائے گی تو نچلی عدالتیں کیا کردار ادا کریں گی؟ سارا نظام مفلوج ہو جائے گا۔