پاکستان ہاکی فیڈریشن نے بھارت کے ساتھ کشیدہ تعلقات اور سیکیورٹی خدشات کے پیش نظر آئندہ ایشیا کپ کے لیے قومی ہاکی ٹیم کو بھارت نہ بھیجنے کا حتمی فیصلہ کر لیا ہے۔
ذرائع کا کہنا ہے کہ پاکستان ہمیشہ کھیل کو سیاست سے الگ رکھنے کا حامی رہا ہے، لیکن بھارتی رویہ اس کے برعکس رہا ہے۔ بھارتی میڈیا مسلسل پاکستان کے خلاف منفی مہم چلا رہا ہے جبکہ انتہا پسند تنظیمیں سوشل میڈیا پر قومی ہاکی ٹیم کو کھلے عام دھمکیاں دے رہی ہیں۔
موجودہ حالات میں پاکستان ہاکی ٹیم کی سیکیورٹی پر سنجیدہ تحفظات کا اظہار کیا گیا ہے، اور فیڈریشن نے یہ فیصلہ کھلاڑیوں کی حفاظت اور امن و امان کی صورتحال کو مدنظر رکھتے ہوئے کیا ہے۔
ذرائع کے مطابق کھیل کے میدان میں کشیدگی کو ہوا دینے کی بجائے امن اور تحفظ کو ترجیح دی گئی ہے، اس لیے ٹیم کی شرکت ممکن نہیں رہی۔
