اسلام آباد:وفاقی وزیر صحت مصطفیٰ کمال نے بریسٹ کینسر ویک کی تقریب سے خطاب کرتے ہوئے کہا کہ پمز (پاکستان انسٹی ٹیوٹ آف میڈیکل سائنسز) میں بریسٹ کینسر کی مفت تشخیص کے لیے ملک کا پہلا جدید اسکریننگ سینٹر قائم کر دیا گیا ہے۔
وزیر صحت نے تقریب سے خطاب میں کہا کہ ’’بریسٹ کینسر کے خلاف سب سے مؤثر قدم بروقت تشخیص ہے‘‘۔ انہوں نے کہا کہ ہمارا مقصد یہ ہے کہ خواتین بیماری کے شکار ہونے سے پہلے ہی اپنی جانچ کروائیں۔
مصطفیٰ کمال نے کہا کہ یہ سینٹر خواتین کو علاج سے پہلے حفاظتی تشخیص کی سہولت فراہم کرے گا تاکہ بیماری کو ابتدائی مراحل میں ہی روکا جا سکے۔ ان کا کہنا تھا کہ ’’ہم نہیں چاہتے کہ لوگ بیمار ہو کر اسپتال آئیں، بلکہ پہلے احتیاط کریں‘‘۔
وزیر صحت نے کہا کہ ’’بریسٹ کینسر سے لڑائی آگاہی سے جیتی جا سکتی ہے، ہمیں اپنی ماؤں، بہنوں اور بیٹیوں کو اس بیماری سے بچانے کے لیے متحد ہونا ہوگا‘‘۔
انہوں نے مزید کہا کہ دکھی انسانیت کی خدمت کرنے والے طبی عملے کو اللہ کے ہاں بڑا اجر ملتا ہے۔ وزیر صحت نے مستقبل کے منصوبوں کا ذکر کرتے ہوئے کہا کہ ضلعی سطح پر بھی بریسٹ کینسر اسکریننگ سینٹرز قائم کیے جائیں گے تاکہ زیادہ سے زیادہ خواتین کو یہ سہولت حاصل ہو۔
