پاکستان سے دہشت گردی کا خاتمہ ہی سانحہ اے پی ایس کا حقیقی انصاف، وزیراعظم شہباز شریف

اسلام آباد: وزیراعظم شہباز شریف نے سانحہ آرمی پبلک اسکول پشاور کی گیارہویں برسی کے موقع پر کہا ہے کہ پاکستان سے دہشت گردی کا مکمل خاتمہ ہی اس سانحے کے متاثرین کے لیے حقیقی انصاف ہوگا۔
اپنے پیغام میں وزیراعظم نے کہا کہ آج پوری قوم ان معصوم بچوں، اساتذہ اور عملے کو خراج عقیدت پیش کرتی ہے جنہوں نے وطنِ عزیز کی حفاظت کے لیے اپنی جانیں قربان کیں۔ انہوں نے مزید کہا کہ یہ دلخراش سانحہ قومی حوصلے کو کمزور نہیں کر سکا اور شہداء کی قربانیاں ہمیشہ قومی یادداشت کا حصہ رہیں گی۔
شہباز شریف نے واضح کیا کہ دہشت گردی کے خلاف جدوجہد ابھی مکمل نہیں ہوئی، اور ملک کے مختلف حصوں میں سیکیورٹی اہلکاروں اور عام شہریوں کو نشانہ بنایا جا رہا ہے۔ انہوں نے کہا کہ دہشت گردی کے خاتمے کے لیے زیرو ٹالرنس پالیسی کے تحت کارروائیاں جاری رہیں گی اور آخری دہشت گرد کے خاتمے تک چین سے نہیں بیٹھا جائے گا۔
وزیراعظم نے دعا کی کہ اللہ تعالیٰ شہداء کو جنت الفردوس میں اعلیٰ مقام عطا فرمائے اور ان کے لواحقین کو صبرِ جمیل دے۔