راولپنڈی: فیلڈ مارشل سید عاصم منیر سے مصر کے وزیر خارجہ ڈاکٹر بدر احمد محمد عبدالعاطی نے ایک اہم ملاقات کی، جس میں دوطرفہ دفاعی تعلقات پر تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق ملاقات میں دونوں رہنماؤں نے پاکستان اور مصر کے باہمی تعلقات کا جائزہ لیا، جس میں خاص طور پر دفاع اور سیکیورٹی تعاون، عسکری سطح پر رابطے، تربیتی تبادلے اور علاقائی امن و استحکام پر زور دیا گیا۔
ملاقات کے دوران دونوں ممالک نے دفاع اور اسٹریٹجک شعبوں میں تعلقات کو مزید مستحکم کرنے کا عزم ظاہر کیا۔ مصری وزیر خارجہ نے فیلڈ مارشل کو ملکی قیادت کی نیک خواہشات بھی پہنچائیں اور پاکستان کے ساتھ ہر شعبے میں تعاون بڑھانے میں مصر کی دلچسپی کا اظہار کیا۔
دونوں جانب سے اس بات پر بھی زور دیا گیا کہ بدلتی ہوئی علاقائی سیکیورٹی کے تناظر میں ابھرتے ہوئے چیلنجز سے نمٹنے کے لیے اعلیٰ سطح کے روابط کا تسلسل انتہائی ضروری ہے۔
