پاکستان اور بنگلہ دیش کے کھلاڑی آج سیاہ پٹیاں باندھ کر میدان میں اتریں گے

ڈھاکا: پاکستان اور بنگلہ دیش کے درمیان دوسرے ٹی ٹوئنٹی میچ میں دونوں ٹیموں کے کھلاڑی سیاہ پٹیاں باندھ کر میدان میں اتریں گے تاکہ طیارہ حادثے کے متاثرین سے اظہارِ یکجہتی کیا جا سکے۔
گزشتہ روز بنگلہ دیش ایئر فورس کا ایک تربیتی طیارہ ڈھاکا کے ایک تعلیمی ادارے پر گر کر تباہ ہو گیا تھا، جس کے نتیجے میں کم از کم 20 افراد جاں بحق اور 171 زخمی ہو گئے تھے۔ اس افسوسناک واقعے کے بعد بنگلہ دیش میں آج یومِ سوگ منایا جا رہا ہے۔
بنگلہ دیش کرکٹ بورڈ (بی سی بی) نے اعلان کیا ہے کہ آج شیرِ بنگلا نیشنل کرکٹ اسٹیڈیم میں ہونے والا دوسرا ٹی 20 میچ حادثے کے متاثرین کے نام منسوب ہوگا۔ میچ کے آغاز سے قبل ایک منٹ کی خاموشی اختیار کی جائے گی۔
میچ آفیشلز اور تمام کھلاڑی سیاہ پٹیاں پہن کر کھیلیں گے جبکہ اسٹیڈیم میں قومی پرچم سرنگوں رہے گا۔ اس کے علاوہ میچ کے دوران کوئی موسیقی یا تفریحی اعلان نہیں کیا جائے گا تاکہ سوگ کی فضا برقرار رہے۔
یاد رہے کہ بنگلہ دیش کو تین میچوں کی سیریز میں 0-1 کی برتری حاصل ہے، جب کہ تیسرا اور آخری ٹی 20 میچ 24 جولائی کو اسی میدان میں کھیلا جائے گا۔