پاکستان اور امریکا کی دوطرفہ تجارت میں نمایاں اضافہ

اسلام آباد: پاکستان اور امریکا کے درمیان دوطرفہ تجارت میں نمایاں بہتری دیکھنے میں آئی ہے اور مالی سال 2024-25 کے دوران یہ 7 ارب 59 کروڑ 80 لاکھ ڈالر تک جا پہنچی۔ یہ اضافہ گزشتہ برس کے مقابلے میں 16 فیصد زیادہ ہے۔
تفصیلات کے مطابق پاکستان کی امریکا کو برآمدات 5 ارب 83 کروڑ 60 لاکھ ڈالر رہیں، جبکہ امریکا سے درآمدات کا حجم ایک ارب 76 کروڑ 30 لاکھ ڈالر ریکارڈ کیا گیا۔
اعداد و شمار کے مطابق پاکستان کی برآمدات میں 10 فیصد اضافہ ہوا۔ اس میں سب سے زیادہ حصہ ٹیکسٹائل مصنوعات کا رہا۔ بیڈ شیٹس، ٹیبل کلاتھ اور کچن لینن کی برآمدات ایک ارب 3 کروڑ 80 لاکھ ڈالر رہیں۔ اسی طرح مردانہ سوٹ، جیکٹس اور پتلون کی برآمدات 93 کروڑ 60 لاکھ ڈالر تک پہنچیں، جب کہ دیگر تیار شدہ ملبوسات 38 کروڑ 60 لاکھ ڈالر میں برآمد کیے گئے۔
ٹی شرٹس کی برآمدات 36 کروڑ 10 لاکھ ڈالر، جب کہ جرسیز، پلوورز اور کارڈیگنز 31 کروڑ 20 لاکھ ڈالر تک ریکارڈ ہوئیں۔ جرابوں (ہوزری) کی برآمدات 27 کروڑ 80 لاکھ ڈالر تک پہنچ گئیں۔ نٹ والے مردانہ شرٹس 24 کروڑ 40 لاکھ ڈالر، چمڑے کی مصنوعات 16 کروڑ 50 لاکھ ڈالر اور خواتین کے سوٹ و ڈریسز کی برآمدات 15 کروڑ 70 لاکھ ڈالر تک محدود رہیں۔
دوسری جانب درآمدات میں بھی 40 فیصد اضافہ ہوا۔ امریکا سے کپاس کی درآمدات سب سے زیادہ 39 کروڑ 30 لاکھ ڈالر رہیں۔ لوہا اور اسٹیل اسکریپ 15 کروڑ 90 لاکھ ڈالر، سویابین 13 کروڑ 70 لاکھ ڈالر اور کوئلہ 5 کروڑ 60 لاکھ ڈالر میں درآمد کیا گیا۔
اس کے علاوہ کیمیکل ووڈ پلپ اور ٹربو جیٹ و گیس ٹربائنز کی درآمدات بالترتیب 5،5 کروڑ ڈالر رہیں۔ آٹومیٹک ڈیٹا پروسیسنگ مشینوں کی درآمدات 4 کروڑ ڈالر، پیٹرولیم آئل 3 کروڑ 80 لاکھ ڈالر، میڈیکل آلات 3 کروڑ 60 لاکھ ڈالر اور خشک میوہ جات 3 کروڑ 30 لاکھ ڈالر تک ریکارڈ ہوئیں۔