کراچی: پانچویں جماعت کی کمسن بچی سے شادی کرنے والا ملزم ضمانت منسوخ ہونے پر عدالت سے فرار ہوگیا۔
ایڈیشنل ڈسٹرکٹ اینڈ سیشن جج ویسٹ نے کم عمر لڑکی سے شادی کے مقدمے میں ملزم ذیشان کی عبوری ضمانت مسترد کردی، تاہم عدالتی فیصلے کے فوری بعد ملزم کمرہ عدالت سے بھاگ نکلا۔
سماعت کے دوران مدعی کے وکیل نے مؤقف اختیار کیا کہ ملزم نے 5ویں جماعت کی طالبہ سے شادی کی، جس پر سندھ چائلڈ میرج ایکٹ کے تحت مقدمہ درج کیا گیا تھا۔ لڑکی کی عمر کے تعین کے لیے میڈیکل ٹیسٹ بھی کرایا گیا، جس سے ثابت ہوا کہ وہ کمسن ہے۔
عدالت نے تمام دلائل کا جائزہ لیتے ہوئے ملزم کی ضمانت منسوخ کر دی اور لڑکی کو حفاظتی اقدام کے تحت شیلٹر ہوم منتقل کرنے کا حکم دے دیا۔ ملزم کے خلاف تھانہ مومن آباد میں مقدمہ درج ہے۔
