اسلام آباد: وفاقی وزیر داخلہ محسن نقوی اور امریکا کی قائم مقام سفیر نیٹلی بیکر کے درمیان ایک اور ملاقات ہوئی جس میں دوطرفہ تعلقات، مشترکہ دلچسپی کے امور اور تعاون بڑھانے پر تبادلہ خیال کیا گیا۔
ملاقات کے دوران پاکستان کو امریکا میں مطلوب افراد کے حوالے سے بات چیت ہوئی جبکہ سرحدی سکیورٹی، انسداد منشیات، کوسٹ گارڈز اور فرانزک کے شعبوں میں تعاون مزید بڑھانے پر اتفاق کیا گیا۔
امریکی سفیر نے خیبرپختونخوا اور پنجاب میں حالیہ سیلاب کے باعث ہونے والے جانی و مالی نقصانات پر افسوس کا اظہار کیا اور متاثرہ خاندانوں سے ہمدردی کی۔
اس موقع پر محسن نقوی نے کہا کہ امریکی صدر ڈونلڈ ٹرمپ کی جانب سے پاکستان میں تیل کے ذخائر میں اضافے کے لیے مشترکہ کوششوں کا اعلان خوش آئند ہے۔ انہوں نے کہا کہ امریکی سرمایہ کار پاکستان میں توانائی سمیت مختلف شعبوں میں سرمایہ کاری کے مواقع سے فائدہ اٹھا سکتے ہیں اور حکومت ان کو مکمل سہولت فراہم کرے گی۔
قائم مقام امریکی سفیر نیٹلی بیکر کا کہنا تھا کہ امریکا پاکستان کے ساتھ تعلقات کو خصوصی اہمیت دیتا ہے اور تعاون کے نئے مواقع تلاش کیے جا رہے ہیں۔
اجلاس میں وفاقی سیکرٹری داخلہ محمد خرم آغا اور ایڈیشنل سیکرٹری داخلہ میجر جنرل نور ولی خان بھی شریک تھے۔
