اسلام آباد: وفاقی محتسب برائے انسدادِ ہراسیت (فوسپا) نے سیکٹر آئی-8 میں واقع 10 کروڑ روپے مالیت کی وراثتی جائیداد کے جھگڑے کا کامیاب حل نکال لیا اور ہما بتول کو ان کا قانونی حصہ فراہم کرنے کا حکم جاری کردیا ہے۔
ہما بتول نے اپنے والد کی جائیداد میں حق کے حصول کے لیے والدہ اور دونوں بھائیوں کے خلاف درخواست دائر کی تھی۔ فوسپا نے معاملے کی سماعت کرتے ہوئے سب سے پہلے سی ڈی اے سے جائیداد کی الاٹمنٹ قانونی ورثاء کے نام منتقل کرائی۔
درخواست موصول ہونے کے بعد فریقین کے درمیان مصالحت کا عمل شروع کیا گیا، جبکہ اصل اختلاف جائیداد کی حقیقی قیمت کے تعین پر تھا۔ انصاف کو یقینی بنانے کے لیے فوسپا نے ایک مقامی کمیشن تشکیل دیا جس نے جائیداد کی مارکیٹ ویلیو 10 کروڑ روپے مقرر کی۔
تمام فریقین نے اس قیمت پر اتفاق کرتے ہوئے مشترکہ بیان جمع کرایا اور تنازعہ خوش اسلوبی سے طے پاگیا۔ معاہدے کے مطابق ہما بتول کو 1 کروڑ 75 لاکھ روپے بطور قانونی حصہ مکمل طور پر ادا کر دیے گئے۔
رقم ملنے کے بعد ہما بتول نے اپنے بھائی عاصم مقبول کے حق میں بھی بیان جمع کرایا، جس کے بعد کیس مکمل طور پر نمٹا دیا گیا۔
فوسپا کے ترجمان کے مطابق اس فیصلے نے نہ صرف وراثتی حقوق کا تحفظ یقینی بنایا بلکہ خاندان کے اندر پیدا ہونے والا تنازعہ بھی باہمی رضامندی سے حل ہوگیا۔
