لاہور: وزیراعلیٰ مریم نواز شریف کی زیر صدارت ٹرانسپورٹ ڈیپارٹمنٹ کا ایک خصوصی اجلاس منعقد ہوا، جس میں مختلف شہروں کے لیے 1500 الیکٹرک بسوں کے پروجیکٹ کی اصولی منظوری دی گئی۔ رپورٹ کے مطابق، پنجاب کے دور دراز شہروں میں مرحلہ وار الیکٹرک بسوں پر مشتمل ٹرانسپورٹ سسٹم شروع کیا جائے گا۔ اجلاس میں یہ فیصلہ کیا گیا کہ پہلے مرحلے میں 380 الیکٹرک بسوں کی خریداری کا عمل جلد مکمل کیا جائے گا، اور یہ بسیں لاہور اور گوجرانوالہ میں چلائی جائیں گی۔
اس اجلاس میں سرگودھا، شیخوپورہ، سیالکوٹ، گجرات، رحیم یار خان، ڈی جی خان سمیت چھ اضلاع میں نئے ٹرانسپورٹ سسٹم کے آغاز پر اتفاق کیا گیا۔ وزیراعلیٰ مریم نواز نے لاہور اور گوجرانوالہ میں الیکٹرک بس سروس کے لیے اگلے جون تک کی ڈیڈلائن مقرر کی۔
فیصل آباد میں اورنج اور ریڈ بس سروس شروع کی جائے گی۔ فیصل آباد کے سمندری روڈ سے سرگودھا روڈ تک ریڈ بس سروس، اور جڑانوالہ سے جھنگ روڈ تک اورنج بس سروس شروع کی جائے گی۔ مریم نواز شریف نے فیصل آباد اور گوجرانوالہ میں الیکٹرک بس ٹریک کے لیے پلان طلب کر لیا۔ اجلاس میں لاہور میں یلیو لائن الیکٹرک بس کے ٹریک کی پلاننگ کے لیے 15 روز کی مہلت دی گئی۔ وزیراعلیٰ نے الیکٹرک بسوں کے چارجنگ سٹیشنز قائم کرنے کے منصوبے کا بھی مطالبہ کیا۔
وزیراعلیٰ نے لاہور میں جدید ترین ٹرانسپورٹ ٹاور کمانڈ اینڈ کنٹرول سینٹر کی منظوری بھی دی۔ اجلاس میں گفتگو کرتے ہوئے انہوں نے کہا کہ وہ تمام عوام کی وزیر اعلیٰ ہیں، اور لاہور سمیت پنجاب کے دوسرے شہروں کے عوام کو بھی جدید ٹرانسپورٹ سسٹم فراہم کیا جائے گا۔
مریم نواز نے مزید کہا کہ ان کی خواہش ہے کہ پنجاب کے ہر بڑے شہر میں شاندار اور جدید ترین بس سسٹم موجود ہو، اور ترقی کے سفر میں تمام شہریوں کو شریک کیا جائے۔
