اسلام آباد: وزیراعظم شہباز شریف نے کہا ہے کہ دہشت گردی کے خلاف جدوجہد میں خیبر پختونخوا پولیس نے ہمیشہ صفِ اول کا کردار ادا کیا ہے۔
کے پی کے مختلف شہروں میں پولیس تھانوں اور چیک پوسٹوں پر حالیہ دہشت گرد حملوں کی شدید مذمت کرتے ہوئے وزیراعظم نے محکمہ انسداد دہشت گردی خیبر پختونخوا کو دہشت گردوں کے خلاف کامیاب آپریشن پر خراجِ تحسین پیش کیا۔
انہوں نے تین دہشت گردوں کو ہلاک کرنے میں کامیابی پر سی ٹی ڈی اور پولیس کی بہادری کو سراہا، جبکہ دہشت گردی کے واقعات میں شہید ہونے والے اہلکاروں کے درجات کی بلندی کی دعا اور ان کے لواحقین سے دلی تعزیت کا اظہار کیا۔
وزیراعظم نے زخمی اہلکاروں کی جلد صحت یابی کی دعا کی اور ہدایت دی کہ انہیں بہترین طبی سہولیات فراہم کی جائیں۔ انہوں نے عزم دہرانے کے ساتھ کہا کہ ملک سے دہشت گردی کے مکمل خاتمے تک یہ جدوجہد جاری رہے گی۔
