اسلام آباد: وزیراعظم شہباز شریف 3 جولائی کو دو روزہ سرکاری دورے پر آذربائیجان روانہ ہوں گے جہاں وہ اقتصادی تعاون تنظیم (ECO) کے سربراہی اجلاس میں شرکت کریں گے۔
سرکاری ذرائع کے مطابق وزیراعظم اپنے دورے کے دوران نہ صرف اجلاس میں پاکستان کی نمائندگی کریں گے بلکہ آذربائیجان کی اعلیٰ قیادت اور رکن ممالک کے سربراہان سے اہم ملاقاتیں بھی کریں گے۔ ان ملاقاتوں میں باہمی تعلقات، اقتصادی شراکت داری، توانائی، تجارت، علاقائی امن اور سفارتی تعاون جیسے اہم امور پر بات چیت متوقع ہے۔
اس دورے کو دونوں ممالک کے درمیان تعلقات کے فروغ اور علاقائی سطح پر سفارتی و اقتصادی روابط کی مضبوطی کے حوالے سے اہم قرار دیا جا رہا ہے۔
حالیہ برسوں میں پاکستان اور آذربائیجان کے درمیان تعلقات میں نمایاں بہتری آئی ہے، اور اس دورے کے دوران مختلف شعبہ جات میں تعاون بڑھانے کے نئے امکانات بھی زیر غور آئیں گے۔
یہ دورہ پاکستان کے علاقائی سفارتی کردار اور اقتصادی مفادات کے فروغ کے لیے ایک اہم پیش رفت ثابت ہو سکتا ہے۔
