اسلام آباد: وزیراعظم محمد شہباز شریف اور صدر مملکت آصف علی زرداری نے ملک بھر میں جاری بارشوں اور سیلاب کے باعث ہونے والے جانی و مالی نقصانات پر گہرا افسوس اور تعزیت کا اظہار کیا ہے۔
وزیراعظم نے سیلاب اور دیگر حادثات میں جان بحق ہونے والوں کے لیے دعا کی اور ان کے لواحقین سے دلی ہمدردی کا اظہار کیا۔ انہوں نے زخمیوں کو فوری طبی امداد فراہم کرنے اور متاثرہ علاقوں میں ریسکیو آپریشنز کو تیز کرنے کی ہدایت کی۔
وزیراعظم نے نیشنل ڈیزاسٹر مینجمنٹ اتھارٹی (این ڈی ایم اے) کو صوبوں اور متعلقہ محکموں کے ساتھ مسلسل رابطے میں رہنے اور انہیں تمام ضروری سہولیات مہیا کرنے کی ہدایت کی۔ ساتھ ہی متاثرہ عوام تک فوری ریلیف پہنچانے اور ممکنہ صورت حال سے نمٹنے کے لیے تمام تیاریوں کو مکمل رکھنے کا حکم دیا۔
وزیراعظم نے نیشنل ہائی وے اتھارٹی اور فورٹ وے آتھارٹی کو بھی سیلاب سے متاثرہ شاہراہوں اور رابطہ سڑکوں کی بحالی کے کام کو تیز کرنے کی ہدایت کی۔
صدر مملکت آصف علی زرداری نے ملک کے مختلف علاقوں میں بارشوں اور سیلاب کے باعث قیمتی جانوں کے ضیاع پر گہرے دکھ کا اظہار کیا۔ انہوں نے جاں بحق افراد کے درجات کی بلندی کے لیے دعا کی اور متاثرہ خاندانوں سے دلی ہمدردی کا اظہار کیا۔
صدر مملکت نے متعلقہ اداروں کو متاثرہ علاقوں میں امدادی کارروائیاں تیز کرنے اور متاثرین کو مکمل امداد و بحالی کی سہولیات فراہم کرنے کی ہدایت کی۔
