پشاور: خیبر پختونخوا کے دارالحکومت میں نجی اسکولوں کی جانب سے میٹرک امتحانات کے دوران طلبا سے مقررہ فیس سے زیادہ رقم وصول کیے جانے کا انکشاف ہوا ہے، جس پر صوبائی حکومت نے فوری کارروائی کا فیصلہ کر لیا۔
یہ فیصلہ کمشنر پشاور ڈویژن ریاض خان محسود کی زیر صدارت ہونے والے اجلاس میں کیا گیا، جو میٹرک امتحانات میں نقل کی روک تھام کے حوالے سے منعقد کیا گیا تھا۔
اجلاس کے دوران چیئرمین پشاور تعلیمی بورڈ نے انکشاف کیا کہ میٹرک امتحانات کے لیے سرکاری طور پر 2600 روپے فیس مقرر کی گئی ہے، تاہم متعدد نجی اسکولوں نے طلبہ سے اس سے زیادہ رقم وصول کی ہے۔
کمشنر پشاور نے فوری ایکشن لیتے ہوئے متعلقہ اسکولوں کی فہرست ڈپٹی کمشنرز کو فراہم کرنے کی ہدایت دی اور زائد فیس وصول کرنے والے اسکولوں کے خلاف سخت کارروائی کا حکم دیا۔
مزید برآں، طلبا سے لی گئی اضافی رقم واپس کرنے کے احکامات جاری کرتے ہوئے متعلقہ حکام سے رپورٹ طلب کر لی گئی ہے۔
