ملک بھر میں منشیات کے خلاف جاری کریک ڈاؤن میں انسداد منشیات فورس (اے این ایف) نے اہم کامیابیاں حاصل کر لیں۔ تعلیمی اداروں کے اطراف سمیت مختلف شہروں میں کی گئی کارروائیوں کے دوران 12 افراد کو گرفتار کیا گیا جن میں 3 خواتین بھی شامل ہیں۔
ترجمان اے این ایف کے مطابق 9 مختلف مقامات پر چھاپے مار کر مجموعی طور پر 245.56 کلوگرام منشیات قبضے میں لی گئی جن کی مالیت تقریباً 2 کروڑ 51 لاکھ روپے سے زائد ہے۔
مانسہرہ میں قراقرم ہائی وے پر ایک کالج کے قریب کارروائی میں ایک شخص سے 700 گرام چرس برآمد ہوئی، جبکہ جامشورو میں یونیورسٹی کے نزدیک بس میں سوار مسافر سے 2 کلوگرام آئس پکڑی گئی۔ ملزمان نے اعتراف کیا کہ وہ تعلیمی اداروں کے طلبہ کو نشہ آور اشیاء فراہم کرتے تھے۔
پشاور رنگ روڈ پر 2 خواتین سے 12 کلوگرام چرس برآمد کی گئی جبکہ جامشورو بس اسٹاپ پر ایک خاتون کے قبضے سے 3 کلو آئس ملی۔ حب میں آر سی ڈی روڈ پر ایک ٹرالر سے 21.6 کلوگرام چرس برآمد ہوئی اور 2 افراد گرفتار کیے گئے۔
سیالکوٹ کے اوتھیان کے قریب ایک گاڑی سے 5 کلو آئس، 3.6 کلو افیون اور 3.6 کلو چرس پکڑی گئی۔ موٹروے M-2 چکری انٹرچینج پر سب سے بڑی کارروائی کی گئی جہاں ایک گاڑی سے 142.74 کلو چرس اور 37.82 کلو افیون برآمد ہوئی۔
مزید برآمدگی میں مانسہرہ کے ایک اور مقام سے 12 کلو چرس جبکہ شیخوپورہ کے پھولوں والا چوک سے ایک موٹر سائیکل سوار سے 1 کلو چرس اور 500 گرام افیون برآمد ہوئی۔
تمام ملزمان کے خلاف انسداد منشیات ایکٹ کے تحت مقدمات درج کر کے مزید تفتیش جاری ہے۔
