ملک میں مہنگائی کی رفتار دوبارہ بڑھ گئی، ضروری اشیاء کی قیمتیں مختلف

ملک میں مہنگائی کی شرح میں دوبارہ تیزی دیکھنے کو مل رہی ہے۔ حالیہ ہفتے میں ہفتہ وار مہنگائی 0.73 فیصد بڑھ گئی جبکہ سالانہ بنیاد پر یہ 4.32 فیصد تک پہنچ گئی ہے۔
وفاقی ادارہ شماریات کی ہفتہ وار رپورٹ کے مطابق، 14 اشیائے ضروریہ کی قیمتوں میں اضافہ ہوا جبکہ 12 کی قیمتیں کم ہوئیں اور 25 اشیاء کے نرخ مستحکم رہے۔ ٹماٹر 28 فیصد، پیاز 10 فیصد اور آلو 4.58 فیصد سستے ہوئے۔ نمک، دال چنا، لہسن، انڈے اور آٹا بھی سستی اشیاء میں شامل ہیں۔
دوسری جانب دال مونگ، گھی، کوکنگ آئل اور خشک دودھ کی قیمتوں میں اضافہ ہوا جبکہ چینی، گڑ، بیف، بجلی، ایل پی جی، سگریٹ اور لکڑی بھی مہنگی ہوئی۔ مختلف شہروں میں چینی 179 سے 220 روپے فی کلو میں فروخت ہو رہی ہے، اور کم آمدنی والے طبقے کے لیے بجلی کے ٹیرف میں 11 فیصد سے زائد اضافہ ریکارڈ ہوا۔
اعداد و شمار کے مطابق، ماہانہ آمدنی 17,732 روپے تک رکھنے والے طبقے کے لیے مہنگائی میں اضافہ 0.094 فیصد کمی کے ساتھ 3.85 فیصد، 17,733 سے 22,888 روپے والے طبقے کے لیے 0.99 فیصد اضافے کے ساتھ 4.70 فیصد، اور 22,889 سے 29,517 روپے والے طبقے کے لیے 0.49 فیصد اضافے کے ساتھ 4.60 فیصد رہا۔
اسی طرح 29,518 سے 44,175 روپے والے طبقے کے لیے 0.28 فیصد اضافے کے ساتھ 4.40 فیصد اور 44,176 روپے سے زائد آمدنی والے طبقے کے لیے 0.60 فیصد اضافے کے ساتھ 3.79 فیصد مہنگائی ریکارڈ کی گئی۔