ملک میں بسنے والا ہر شہری خواہ کسی بھی مذہب سے ہو، برابر کا پاکستانی ہے، محسن نقوی

اسلام آباد:وفاقی وزیر داخلہ محسن نقوی نے کہا ہے کہ پاکستان میں رہنے والا ہر شہری، چاہے کسی بھی مذہب سے تعلق رکھتا ہو، برابر کا پاکستانی ہے۔
انہوں نے اپنے بیان میں کہا کہ پاکستان اسلام کے سنہری اصولوں جیسے عدل، مساوات اور رواداری کی بنیاد پر قائم ہوا ہے اور ہمیشہ انہی اصولوں پر قائم رہے گا۔ پاکستان اقلیتوں کے جان و مال، عقیدے اور عبادات کی آزادی کو نہ صرف آئینی حق بلکہ اپنی ریاستی پہچان سمجھتا ہے۔
محسن نقوی نے مزید کہا کہ دین اسلام جبر کی سختی سے ممانعت کرتا ہے، عقیدے کی آزادی دیتا ہے اور انسانیت کی عزت سکھاتا ہے، یہی تعلیمات اقلیتوں کے تحفظ کی بنیاد ہیں۔ انہوں نے قائداعظم کے 11 اگست 1947 کے خطاب کا حوالہ دیتے ہوئے کہا کہ پاکستان کے ہر شہری کو مساوی حقوق حاصل ہیں اور آئین بھی اقلیتوں کے بنیادی حقوق کی مکمل ضمانت دیتا ہے۔
وزیر داخلہ نے کہا کہ پاکستان کی تمام اقلیتیں عزت، مساوات اور قومی ترقی میں بھرپور حصہ دار ہیں۔ انہوں نے تعلیم، صحت، دفاع اور سیاست سمیت دیگر شعبوں میں اقلیتوں کی شاندار خدمات کو سراہا اور کہا کہ اقلیتوں کا کردار پاکستان کے قومی ورثے میں ایک روشن باب ہے۔
محسن نقوی نے کہا کہ حب الوطنی، خدمت اور کردار ہی پاکستانی شناخت کے اصل معیار ہیں اور پاکستان میں نسلی یا مذہبی امتیاز کی کوئی جگہ نہیں۔ ریاست ہمیشہ اقلیتوں کے جان و مال اور مقدس مقامات کے تحفظ کو اولین ترجیح دیتی ہے اور عبادت گاہوں کی تزئین و حفاظت اور سیکیورٹی کے انتظامات بھی کیے جاتے ہیں۔
انہوں نے کہا کہ جنگی حالات کے باوجود کرتارپور راہداری اور ننکانہ صاحب کو کھلا اور محفوظ رکھنا پاکستان کے امن اور بین المذاہب ہم آہنگی کی واضح مثال ہے۔ پاکستان اقلیتوں کو مکمل حقوق دیتا ہے کیونکہ وہ اس ملک کے برابر کے وارث ہیں۔
وزیر داخلہ نے کہا کہ حکومت کی پالیسی، نیت اور عمل اقلیتوں کے تحفظ، آزادی اور شراکت داری کے لیے یکساں ہیں اور اس پر کوئی سمجھوتہ نہیں کیا جائے گا۔ قومی دن پر اقلیتوں کے بنیادی حقوق کے تحفظ کے عزم کا اعادہ کیا گیا ہے۔