ملک بھر کے صارفین کے لیے خوشخبری: بجلی کی قیمت میں فی یونٹ کمی کا امکان

اسلام آباد: ملک کے بجلی صارفین کے لیے ایک خوش آئند خبر سامنے آئی ہے، جس کے تحت بجلی کے نرخوں میں فی یونٹ ایک روپے 75 پیسے تک کمی کا امکان ہے۔
سینٹرل پاور پرچیزنگ ایجنسی (CPPA) نے مالی سال 2024-25 کی چوتھی سہ ماہی ایڈجسٹمنٹ کے تحت بجلی کی قیمتوں میں کمی کے لیے نیشنل الیکٹرک پاور ریگولیٹری اتھارٹی (NEPRA) کو باضابطہ درخواست جمع کرا دی ہے، جس پر نیپرا آج سماعت کرے گی۔
درخواست کی منظوری کی صورت میں بجلی صارفین کو مجموعی طور پر 53 ارب 39 کروڑ روپے سے زائد کا ریلیف مل سکتا ہے۔ یہ ریلیف نہ صرف سرکاری بجلی تقسیم کار کمپنیوں (DISCOs) بلکہ کے الیکٹرک کے صارفین پر بھی لاگو ہو گا۔
ذرائع کے مطابق اگر نیپرا نے ستمبر، اکتوبر اور نومبر کے لیے ایڈجسٹمنٹ کی منظوری دے دی تو بجلی کی قیمت میں 2 روپے 10 پیسے فی یونٹ تک کمی ممکن ہے، جبکہ اگست، ستمبر اور اکتوبر کے لیے فی یونٹ ایک روپے 75 پیسے کمی کی تجویز دی گئی ہے، جس سے بجلی کے ماہانہ بلوں میں واضح کمی متوقع ہے۔
نیپرا درخواست پر سماعت مکمل کرنے کے بعد حتمی فیصلہ جاری کرے گی۔