معرکہ حق کی فتح اور آزادی کا جشن بھارت کے لیے واضح پیغام ہے، عطا اللہ تارڑ

اسلام آباد: وفاقی وزیر اطلاعات عطا اللہ تارڑ نے کہا ہے کہ معرکہ حق میں کامیابی اور آزادی کا جشن پاکستان کی قوم کے عزم اور اتحاد کا ثبوت ہے، جو بھارت کے لیے ایک واضح پیغام ہے۔
میڈیا سے گفتگو میں عطا اللہ تارڑ کا کہنا تھا کہ اللہ کے فضل سے دشمن کو معرکہ حق میں شکست ہوئی اور اس سے یوم آزادی کی خوشیاں دوبالا ہو گئی ہیں۔ قوم نہ صرف آزادی کا جشن منا رہی ہے بلکہ فتح کی مسرت بھی ہر دل میں بسا لی ہے۔
انہوں نے کہا کہ چھوٹے بچوں سے بزرگوں تک سبز ہلالی پرچم تھامے گھروں سے نکلے ہوئے ہیں، پارلیمنٹ ہاؤس اور دیگر اہم عمارتوں کے سامنے قومی پرچموں کے سائے تلے جشن منایا جا رہا ہے۔
وفاقی وزیر اطلاعات کے مطابق یہ جشن اس بات کا اظہار ہے کہ زندہ قومیں اپنی آزادی کا تحفظ اور کامیابیوں کا جشن کیسے مناتی ہیں۔ آج رات 12 بجے ملک بھر میں شاندار آتش بازی کے مظاہرے ہوں گے جو براہ راست ٹی وی پر نشر کیے جائیں گے، جبکہ تقریبات میں ملی نغمے اور پریڈ بھی شامل ہوں گی۔
انہوں نے بتایا کہ کل صبح مختلف مقامات پر پرچم کشائی کی تقریبات ہوں گی، شکر پڑیاں میں بھی خصوصی تقریب کا انعقاد ہوگا۔ پوری قوم کو جشن آزادی اور معرکہ حق کی فتح مبارک ہو۔
عطا اللہ تارڑ نے مزید کہا کہ یہ تاریخی موقع پاکستان کے اتحاد، عزم اور حوصلے کی علامت ہے۔ مری میں ہونے والے اجلاس میں ضمنی انتخابات کے بارے میں مشاورت ہوئی تھی، تاہم ذاتی مصروفیات کے باعث وہ اجلاس میں شریک نہ ہو سکے۔