محکمہ موسمیات کی پیشگوئی؛ اس سال سردی معمول سے کم، بارشیں بھی کم ہوں گی

کراچی: محکمہ موسمیات نے رواں سال موسمِ سرما میں معمول سے کم سردی اور کم بارشوں کی پیشگوئی کی ہے۔
محکمہ موسمیات کے ترجمان انجم نذیر کے مطابق نومبر، دسمبر اور جنوری میں درجہ حرارت اوسط سے زیادہ رہنے کا امکان ہے، خاص طور پر شمالی علاقوں میں سردی گزشتہ برسوں کے مقابلے میں کم محسوس ہوگی۔
ترجمان نے بتایا کہ رواں موسمِ سرما میں بارشوں کی مقدار بھی معمول سے کم رہے گی، تاہم جنوری کے اختتام پر ایک بارش کا سلسلہ متوقع ہے۔ بارشوں میں کمی کے باعث پنجاب اور بالائی سندھ میں اسموگ کی شدت میں اضافہ اور فضائی معیار کی مزید خرابی کا خدشہ ہے۔
مزید بتایا گیا کہ بحیرہ عرب میں ایک ڈپریشن موجود ہے جو کراچی سے تقریباً 1800 کلومیٹر کے فاصلے پر ہے، تاہم اس کا پاکستان کے ساحلی علاقوں پر کوئی اثر نہیں ہوگا۔
انجم نذیر کے مطابق مڈغاسکر کے قریب موجود سمندری طوفان کے اثرات سے بحیرہ عرب کا ڈپریشن مزید طاقتور ہونے کا امکان نہیں۔