متحدہ عرب امارات نے غزہ میں پانی کی شدید قلت کا سامنا کرنے والے فلسطینیوں کے لیے روزانہ 20 لاکھ گیلن صاف پینے کے پانی کی بلا تعطل فراہمی کا مستقل بندوبست کر لیا ہے۔
یہ پانی رفح کے قریب یو اے ای کے قائم کردہ ڈیسالینیشن پلانٹس سے حاصل کیا جا رہا ہے، جو ایک نئی 6.7 کلومیٹر طویل پائپ لائن کے ذریعے خان یونس تک پہنچایا جا رہا ہے۔
غزہ میں جاری اسرائیلی حملوں کے نتیجے میں پانی کی 85 فیصد سے زائد بنیادی تنصیبات تباہ ہو چکی ہیں، جس کے باعث لاکھوں افراد پینے کے صاف پانی سے محروم ہو چکے تھے۔
امارات کی جانب سے متاثرہ علاقوں میں نئی پائپ لائنز کی تنصیب کے ذریعے پانی کی ترسیل دوبارہ بحال کر دی گئی ہے، جو لاکھوں فلسطینیوں کے لیے نئی زندگی کی نوید ہے۔
یہ تمام امدادی سرگرمیاں “آپریشن الفارس الشہم 3” کے تحت انجام دی جا رہی ہیں، جو غزہ کے عوام کے لیے یو اے ای کی جانب سے انسانی ہمدردی پر مبنی مہم ہے۔ اس کے ساتھ فضائی امداد کی “طیور الخیر” سروس کو بھی دوبارہ فعال کر دیا گیا ہے تاکہ امداد جلد از جلد متاثرہ علاقوں تک پہنچائی جا سکے۔
