متحدہ عرب امارات نے ایک لاکھ پاکستانیوں کو پانچ سال کے لیے ویزہ دینے کا اعلان کیا ہے۔ یو اے ای کے سفیر حماد عبید الزہبی نے اس بات کا اظہار گورنر سندھ کامران ٹیسوری کی آمد کے موقع پر کیا۔ انہوں نے کہا کہ ویزہ حاصل کرنے والے پاکستانیوں کا ریڈ کارپٹ پر استقبال کیا جائے گا اور ویزہ سینٹر میں انہیں بھرپور عزت دی جائے گی۔
قبل ازیں گورنر سندھ نے یو اے ای قونصلیٹ میں قائم ویزہ سینٹر کا دورہ کیا اور سفیر سے سینٹر کے بارے میں تفصیل سے آگاہی حاصل کی۔ اس دوران گورنر سندھ نے ویزہ حاصل کرنے والے افراد سے بھی بات کی اور یو اے ای کی جانب سے فراہم کی جانے والی سہولتوں پر شکریہ ادا کیا۔
کامران خان ٹیسوری نے میڈیا سے گفتگو کرتے ہوئے کہا کہ ان کا استقبال ریڈ کارپٹ پر کیا گیا، جو یو اے ای کی محبت اور احترام کا غماز ہے۔ انہوں نے یہ بھی بتایا کہ یو اے ای ایس آئی ایف سی منصوبے میں بھرپور دلچسپی لے رہا ہے۔
