قطر کے وزیراعظم شیخ محمد بن عبدالرحمان الثانی نے کہا ہے کہ اسرائیل کے حالیہ حملوں نے یرغمالیوں کی رہائی کے امکانات تقریباً ختم کر دیے ہیں۔
امریکی ٹی وی کو دیے گئے انٹرویو میں انہوں نے کہا کہ اسرائیلی وزیراعظم نیتن یاہو نے بین الاقوامی قوانین کی کھلی خلاف ورزی کی ہے اور انہیں انصاف کے تقاضوں کے مطابق جواب دہ ہونا چاہیے۔
قطری وزیراعظم نے مزید کہا کہ حماس پر کیے جانے والے حملوں نے یرغمالیوں کی صورتحال کو مزید مشکل بنا دیا ہے اور اب ان کی رہائی ناممکن کے قریب ہے۔
یاد رہے کہ 9 ستمبر کو اسرائیل نے قطر کے دارالحکومت دوحہ میں فضائی کارروائی کی، جس میں حماس کی قیادت کو نشانہ بنایا گیا۔ حماس کے مطابق اس حملے میں تنظیم کے سینئر رہنما خلیل الحیہ کے بیٹے اور دفتر کے ڈائریکٹر سمیت چھ افراد شہید ہوئے جبکہ مرکزی قیادت محفوظ رہی۔ قطر کی وزارت داخلہ نے بھی تصدیق کی کہ حملے میں ایک سکیورٹی اہلکار ہلاک اور ایک زخمی ہوا۔
