سیالکوٹ: فیلڈ مارشل سید عاصم منیر نے پنجاب کے سیلاب سے متاثرہ اضلاع، جن میں سیالکوٹ سیکٹر، شکرگڑھ، نارووال اور کرتارپور شامل ہیں، کا دورہ کیا اور ریسکیو اہلکاروں کی عوامی خدمت پر حوصلہ افزائی کی۔
اس موقع پر آرمی چیف کو سیلابی صورتحال اور آئندہ بارشوں کے حوالے سے تیاریوں پر تفصیلی بریفنگ دی گئی۔ انہوں نے متاثرہ علاقوں میں جاری امدادی و ریسکیو آپریشنز کا جائزہ لیا اور فوجی جوانوں و سول اداروں کی انتھک محنت کو سراہا۔
فیلڈ مارشل عاصم منیر نے سیالکوٹ سیکٹر میں سکھ برادری سے ملاقات کی اور انہیں یقین دلایا کہ سیلاب سے متاثرہ تمام مذہبی مقامات، خصوصاً دربار صاحب کرتارپور، کو فوری طور پر اصل حالت میں بحال کیا جائے گا۔ ان کا کہنا تھا کہ اقلیتوں اور ان کے مذہبی مقامات کا تحفظ ریاست کی بنیادی ذمہ داری ہے اور پاکستان اس فریضے میں کوئی کمی نہیں آنے دے گا۔
سکھ کمیونٹی نے آرمی چیف کا پرجوش خیر مقدم کرتے ہوئے سول انتظامیہ اور فوج کی خدمات پر شکریہ ادا کیا۔ فیلڈ مارشل نے دربار صاحب کرتارپور کا فضائی معائنہ بھی کیا۔
انہوں نے کہا کہ بروقت اور مربوط حکمت عملی کے باعث قیمتی جانوں اور املاک کے نقصانات کو کم سے کم رکھنے میں مدد ملی۔ سپاہیوں سے خطاب میں آرمی چیف نے ان کے بلند حوصلے، آپریشنل تیاری اور عوامی خدمت کے جذبے کو خراج تحسین پیش کیا۔
فیلڈ مارشل سید عاصم منیر کی آمد پر کور کمانڈر گوجرانوالہ نے ان کا استقبال کیا۔
