نیویارک: اقوام متحدہ کی سلامتی کونسل کے سہ ماہی اجلاس کی صدارت کرتے ہوئے پاکستان کے نائب وزیراعظم اسحاق ڈار نے مشرق وسطیٰ کی صورت حال اور فلسطینی کاز پر ایک جامع اور مؤثر خطاب کیا۔
اجلاس کا مرکزی موضوع مشرق وسطیٰ کے حالات، بالخصوص فلسطین تھا، جس پر اظہارِ خیال کرتے ہوئے اسحاق ڈار نے اسرائیل کی جانب سے اسپتالوں، اسکولوں، اقوام متحدہ کی عمارتوں اور پناہ گزین کیمپوں پر بمباری کو ایک منظم اور سوچے سمجھے منصوبے کا حصہ قرار دیا۔ ان کا کہنا تھا کہ ان حملوں کا مقصد فلسطینیوں کو اجتماعی سزا دینا ہے، جو بین الاقوامی قوانین اور اقوام متحدہ کی قراردادوں کی کھلی خلاف ورزی ہے۔
انہوں نے سلامتی کونسل کو خبردار کیا کہ فلسطینی مسئلہ اب اقوام متحدہ کی ساکھ اور عالمی اثرورسوخ کا امتحان بن چکا ہے۔ اگر اس مسئلے کا فوری اور منصفانہ حل نہ نکالا گیا تو ادارے کی حیثیت کو ناقابلِ تلافی نقصان پہنچے گا۔
اسحاق ڈار نے عالمی برادری سے اپیل کی کہ وہ جنگ بندی کے فوری نفاذ اور انسانی امداد کی بلا تعطل رسائی کو یقینی بنائے تاکہ معصوم فلسطینیوں کی مشکلات میں کمی آ سکے۔
انہوں نے مشرق وسطیٰ میں مستقل امن کے قیام کے لیے شام، لبنان اور ایران سے متعلق مسائل کو بھی حل کرنے پر زور دیا۔ خطاب کے آخر میں ان کا کہنا تھا کہ وقت آ چکا ہے کہ فلسطینی عوام کو انصاف، آزادی، خودمختاری اور عزت کے ساتھ ایک آزاد ریاست کا حق دیا جائے۔
دفتر خارجہ کی جانب سے جاری ایک بیان میں کہا گیا کہ پاکستان کی قیادت میں اس اہم اجلاس کو وزارتی سطح پر اپ گریڈ کیا گیا، جس میں پاکستان کا مؤقف بھرپور انداز میں پیش کیا گیا۔