راولپنڈی: تھانہ روات کی حدود میں پیش آنے والے افسوسناک واقعے میں نامعلوم مسلح افراد نے 60 سالہ خاتون کو گولیاں مار کر قتل کر دیا۔ مقتولہ مسرت بی بی پراپرٹی کا کاروبار کرتی تھیں اور متعدد زمینوں کی مالک بھی تھیں۔
پولیس کے مطابق تین مرد اور ایک خاتون نے مسرت بی بی سے رابطہ کر کے فارم ہاؤس خریدنے کے بہانے انہیں ایک مخصوص مقام پر بلایا۔ خاتون جب ان کے ہمراہ زمین دکھانے کے لیے روانہ ہوئیں تو چک بیلی روڈ کے قریب پہنچنے پر ملزمان نے اچانک فائرنگ کر دی، جس سے وہ موقع پر ہی جاں بحق ہو گئیں۔
پولیس کا کہنا ہے کہ مقتولہ کا ان افراد کے ساتھ زمین کی خرید و فروخت کا لین دین جاری تھا، جس کے تناظر میں یہ حملہ کیا گیا۔ لاش کو پوسٹمارٹم کے لیے اسپتال منتقل کر دیا گیا ہے جبکہ حملہ آوروں کی گرفتاری کے لیے چھاپے مارے جا رہے ہیں۔
سی پی او سید خالد ہمدانی نے واقعے کا نوٹس لیتے ہوئے ایس پی صدر سے تفصیلی رپورٹ طلب کی ہے اور ملزمان کو فوری طور پر گرفتار کرنے کی ہدایت کی ہے۔ ایس پی صدر محمد نبیل کھوکھر کا کہنا ہے کہ معاملے کی ہر زاویے سے تفتیش کی جا رہی ہے، اور جلد ملزمان کو قانون کے کٹہرے میں لایا جائے گا۔
