غزہ پر اسرائیلی جارحیت میں شدت برقرار، گزشتہ 24 گھنٹوں میں 93 مزید فلسطینی شہید ہو گئے ہیں۔ الجزیرہ اور مقامی طبی ذرائع کے مطابق شہداء میں 30 افراد وہ تھے جو صرف خوراک کے حصول کے لیے قطار میں کھڑے تھے۔
غزہ کی وزارت صحت نے تصدیق کی ہے کہ آج صبح سے اب تک مزید 18 فلسطینی جاں بحق ہو چکے ہیں، جو ظاہر کرتا ہے کہ اسرائیلی حملوں کی شدت میں کسی قسم کی کمی نہیں آئی۔
ادھر فلسطینی وزارت صحت نے اعلان کیا ہے کہ عالمی ادارہ صحت (WHO) اور یونیسف (UNICEF) کے تعاون سے بچوں کی ویکسین اور ضروری طبی سامان سے بھرپور امدادی قافلہ غزہ کے مختلف اسپتالوں کی طرف روانہ کر دیا گیا ہے۔
یہ امدادی قافلہ صرف طبی نوعیت کے سامان پر مشتمل ہے، خوراک اس میں شامل نہیں۔ وزارت صحت نے تمام متعلقہ اداروں اور فریقین سے اپیل کی ہے کہ قافلے کو مکمل تحفظ فراہم کیا جائے تاکہ زخمیوں کے علاج اور جانیں بچانے میں مدد مل سکے۔
