غزہ میں اسرائیلی بمباری اور حملوں کے دوران عالمی شہرت یافتہ فلسطینی فٹبالر سلیمان عبید سمیت 662 فلسطینی کھلاڑی اور کھیلوں کے عہدیدار جان بحق ہو چکے ہیں۔
فلسطینی فٹبال ایسوسی ایشن کے مطابق اکتوبر 2023 سے اسرائیلی فوج نے غزہ اور مقبوضہ مغربی کنارے میں 288 کھیلوں کے میدان، اسٹیڈیمز، جم اور کلب مکمل طور پر تباہ کر دیے ہیں۔
حالیہ اسرائیلی حملے میں ’پیلے آف فلسطین‘ کے نام سے معروف فٹبالر سلیمان العبید بھی شہید ہوئے۔ ایسوسی ایشن نے بتایا کہ بمباری کے باعث غزہ میں فلسطینی فٹبال ایسوسی ایشن کا ہیڈکوارٹر بھی مکمل تباہ ہو گیا ہے۔
اتوار کو اسرائیلی حملوں میں مزید 52 فلسطینی شہید ہوئے، جبکہ اسرائیلی محاصرے اور قحط کی وجہ سے غذائی قلت سے ہلاک ہونے والوں کی تعداد 217 ہو گئی ہے، جن میں 100 بچے شامل ہیں۔
اسرائیلی وزیراعظم نے کہا ہے کہ حماس کی جانب سے ہتھیار ڈالنے سے انکار کے بعد اسے ختم کرنا ناگزیر ہے، جبکہ حماس نے ردعمل میں نیتن یاہو پر الزام لگایا ہے کہ وہ حقائق چھپا کر جنگی جرائم کا جواز پیش کر رہے ہیں اور جنگ کو طول دینے کے لیے یرغمالیوں کا سہارا لے رہے ہیں۔
